በመንፈስ ዓለም የሰው ልጆችን እየገዙ ያሉ ሁለት መንግስታት አሉ። አነርሱም የእግዚአብሔር መንግስት እና የሰይጣን መንግስት ናቸው። የሁለቱም መንግስታት ሐሳብ እና ዓላማ በሚገዙት ሕዝብ የሕይወት ስርዓት ይታያል። የእግዚአብሔር መንግስት የሕይወት መገለጥ ጽድቅ እና ሰላም በመንፈስ ቅዱስ የሆነ ደስታ ሲሆን የሰይጣን መንግሰት የሕይወት መገለጥ ደግሞ ዓመጻ፣ ኃጢያት፣ ሞት፣ ሐዘን፣በሽታ፣ ባርነት እና ጥፋት ነው። የእግዚአብሔር መንግስት ጌታ እና ንጉስ በሆነው በኢየሱስ ክርስቶስ ገዢነት የሚተዳደር የብርሃን መንግስት ሲሆን የሰይጣን መንግስት በሰይጣን እና በመላዕክቱ ገዢነት የሚተዳደር የጨለማ መንግስት ነው። የእግዚአብሔር መንግስት ለዘላለም ጸንቶ የሚኖር ሲሆን የሰይጣን መንግስት ግን በፍርድ ለዘላለም ጥፋት የተወሰነ መንግስት ነው። መንሹ በእጁ የሆነው ጌታ በፍርድ ቀን አውድማውን ሲያጠራ ስንዴውን (የእግዚአብሄርን ልጆች) ከእንክርዳዱ (ከዲያብሎስ ልጆች) ይለያል። ስንዴውን ወደ ጎተራው (ወደ ዘላለማዊ መንግስቱ እና ሐገሩ) እንክርዳዱን ወደ ማይጠፋ እሳት (ወደ ዘላለም እሳት ፍርድ) ይከታቸዋል። አሁን ያለንበት ዘመን፤ እግዚአብሔር በምሕረቱ እና በጸጋው ሰዎች ሁሉ በኢየሱስ ክርስቶስ ስም የኃጢአትን ስርየት ተቀብለው የእግዚአብሔርን መንግስት መውረስ የሚችሉበት፤ የንስሐ እና የምሕረት ዘመን ነው። የዚህም አገልግሎት ዋነኛ ተልዕኮው ሰዎችን ከጨለማ አገዛዝ በእግዚአብሔር ኃይል ነጻ እያወጡ ከፍርድ እና ከሚመጣው ቁጣ አምልጠው ወደ ፍቅሩ ልጅ መንግስት እንዲፈልሱ ማድረግ ነው። እግዚአብሔር መንግስት እንጂ ኃይማኖት የለውምና፤ የሰማያዊ መንግስት እንጂ የኃይማኖት ተልዕኮ የለንም።